OSOKO BILKURA

Plaza Zaharreko etxe txikia bota, Itxaropenako terrazarako irisgarritasuna hobetu eta kiroldegiko aldagelak zaharberritzeko diruak

Ubane Madera Zangitu 2023ko mai. 25a, 10:08
Plaza Zaharreko etxetxoa.

Atzo, agintaldiko azkeneko osoko bilkura egin zuen udalbatzarrak. Gai guztiak onartu ziren aho batez. Haien artean, 369.460 eurotako kreditu espediente gehigarriak. zeintzuen bidez finantzatuko diren hainbat jarduera, besteren artean: Plaza Zaharreko etxetxoa desjabetzeko prozesua, Itxaropena Erretiratuen Elkarteko terrazarako irisgarritasuna bermatzeko lanak eta kiroldegiko frontoiko aldagelak zaharberritzea.

Plaza Zaharreko etxe txikiari dagokionez (aroztegia izan zena), ordenazioz kanpo dago eta hura desjabetzeko prozesua abiaraziko du Soraluzeko Udalak, ondoren eraisketa proiektua egin eta eraikina botatzeko. Prozesua hasita dago eta aurrera segitzeko 22.000 euro bideratzea onartu zuen udalbatzarrak aho batez.

Montakargas-a terrazara irteteko

Bestalde, Itxaropena Erretiratuen Elkartetik bertako terrazara irteteko montakargas bat jarri nahi du Udalak taberna barrutik eta horrekin terrazarako irteteko aukera erraztuko du. Bada, proiektu horretarako 40.000 euroko partida bideratzea onartu zuen udalbatzarrak aho batez. 

Eta bestelako partiden artean, nabarmenena 125.000 eurokoa izan zen. Kasu horretan, partida hori onartu zen kiroldegi barreneko solairuko aldagelak zaharberritzeko, frontoikoak. Iker Aldazabal alkateak esplikatutakoaren arabera, oso zaharkituta daude eta iritsi zaie berritzeko ordua.