Zapatuan, Igoera faseko azken partida jokatuko dute Erregional mailako talde guztiek, Sorak barne. Partida guztiak ordu berean izango dira: zapatuan, 18:30ean.
Soraren kasuan, bere esku izango du Gorengo mailara igotzeko aukera. Izan ere, Igoera faseko azken partida sailkapenean bigarren dagoen Zumaiakoren kontra jokatuko du. Beraz, partida irabazten duenak ziurtatuta izango du Gorengo mailarako igoera. Irabazi ezean, berriz, gainerako ekipoen emaitzen menpe izango da Sora.
Hori bai, Zumaiakoren etxean du hitzordua Sorak eta taldeak herritarren babesa eta bultzada izan dezan, autobusa ipiniko du Sorako zuzendaritzak, doan. Autobusa 17:30ean abiatuko da Soraluzetik. Bertan joateko izena Bolian edo Edurtzan eman beharra dago eta eguena izango da horretarako azkeneko eguna.
Bestalde, Sorako kadeteek ere mailaz igotzeko aukera jokoan dute zapatuan. Kasu horretan, liderraren, Tolosaren kontrako norgehiagoka dute hirugarren doazen kadeteek. Haiek ere kanpoan jokatuko dute, Tolosan, 13:15ean.