Jokin Muñozek gaur izan du lehen lasterketa, lesio bat izan eta errekuperazioarekin urtebetez lehiatu barik egon ondoren. Eta estreinaldi “borobila” izan du, haren familiakoek esan duten moduan. Soraluzen bizi den mendaroarra lehenengo helmugaratu da Gasteizko Martin Fiz Maratoian, 42 kilometroak 2:24:50ean eginez. Minutu bat eta zazpi segundu atera dizkio bigarrenari.
Muñozek ez zuen espero gaurko lasterketa irabazterik eta pozik ospatu du garaipena senide eta lagunekin. Hain justu, haiei dedikatu die gaurko garaipena, “beti ondoan” dituen horiei “eskertzeko asko” duela adieraziz eta esanez eurak gabe ez litzatekeela posible izango. Familia, lagunak eta jarraitzaile sutsua zuen Mikel Iñurrieta aitaginarreba izan ditu gogoan Jokin Muñozek. Eta haiek herrian zain zituen, ezustekoa emateko gertu, Muñozen garajean ezkutuan, kartel koloretsu eta guzti ongi-etorri ezin beroagoa eginez.