Pentsiodunen mugimenduaren iritziz, Eusko Jaurlaritzak baditu “eskumenak eta baliabideak” pentsioak 1.080 euroraino osatzeko, “baina lan-bizitza oso baten ondoren bizi-maila duina izateko aukerarik ematen ez duten pentsioak” jasotzen dituztenei ez die erantzuten DSBEak.
Atzo, plazan egindako elkarretaratzean, kritikatu egin zuten DSBEa kalkulatzeko sistema: “Bizikidetza-unitate bat osatzeko baldintza ezartzean, automatikoki lotzen du eskatzailea bere ezkontide edo bikotekidearekin; beraz, biak pentsiodunak badira, diru-sarrerak elkartu egiten dira ondorio guztietarako”.
Emakumeak kaltetuenak
Zentzu horretan, gogora ekarri zuten emakumeak direla “pentsiorik apalenak” dituztenak, eta, beraz, “beste pertsona batekin bikotean bizitzeak DSBEtik kanpo uzten ditu, eta ezkontidearen edo izatezko bikotearen mende egotera edo bakarrik bizitzera behartuta daude” .
Horregatik diote DSBEak “zigortu” egiten dituela “emakume pentsiodunak, biak pentsiodunak diren bikoteak, baita etxe berean beste bizikidetza-unitate batzuekin bizi diren pentsiodunak ere, familiakoak izan ala ez, automatikoki dagokien DSBEa %15ean murrizten dietelako”.
Eusko Jaurlaritzari buruz, berriz, diote haren “zikoizkeria muturreraino” iristen dela, ez duela “ofizioz jardun nahi adinekoei bizitza duina bermatzeko betebeharra betetzeko”. Datuak ere eman zituzten: “2022ko abenduan, 12.686 pentsiodunek soilik jaso zuten DSBE osagarria EAEn, hilean 700 eurotik beherako 40.000 alargun-pentsio baino gehiago zeudenean, eta 62.000 pentsiodun baino gehiago pobrezia larrian zeudenean, hilean 454 eurotik beherako pentsioekin”.
Emakumeei dagokienez, berriz, uste dute Jaurlaritzak “azaldu” egin behar duela “zergatik euskal milaka emakumek ez duten behar adinako diru-sarrerarik beren bizitzaren azken etapan”.
1.080 euroko pentsioa
Horregatik guztiagatik segituko dute 1.080 euroko gutxieneko pentsioa aldarrikatzen, hamalau pagatan. Argi dute kopuru hori dela “EAEko pentsiodun bakoitzari bizitza duina bermatzeko, inflazio handiari aurre egiteko, elikagai eta oinarrizko produktuen %16 baino gehiagoko handitzeari aurre egiteko, eta pentsioetan %36tik gorako genero-aldea murrizteko”.
Atzo, astelehena, 45 herritarrek babestu zuten pentsio publiko dueinen aldeko protesta eta joan den astelehenean ere 40tik gora izan ziren, azken boladako elkarretaratze jendetsuenak.