Azken jardunaldia gazi gozoa izan zen Soraluzeko pilota klubeko jokalarientzat. Domeka goizean, gozotik probatu zuen Aitor Atxotegik Rodriguez zestoarrari gomazko paletan hogeitabost eta bederatzi irabazi eta gero, partidu osoan zehar nagusitasun osoa erakutsita gainera. Zapatuan, gazitik probatu zuten Aitz Arluziagak eta Laida Sanchezek Errendimendu mailako Gipuzkoako Txapelketako partidua Azpeitian tantu bakarrarengatik galduta, nahiz eta ondo jokatu: 16 eta 15. Azkenik, barixakuan, Muruak eta Balerdik 22 eta 16 irabazi zuten Arane frontoian jokatu zuten eskuz binakako Euskal Ligako bigarren jardunaldikoa.