Langabezia gora

Eibarren eta Mendaron izan ezik, eskualdeko gainerako herri guztietan gora egin du langabeziak abenduko datuen arabera. Soraluzeko kasuan, urteko bigarren daturik txarrena laga du 2022ko azken hilabeteak, %12,92ko langabezia tasarekin. Debabarreneko tasarik altuenarekin segitzen du.

Abenduak ez ditu datu onak laga langabeziari dagokionez, ez Soraluzen eta ezta Debabarrenean ere. Azken datuen arabera, Soraluzen azaroan baino 6 langabe gehiago kontabilizatu zituzten abenduan eta tasa igo egin da %12,59tik %12,92ra.

Debabarrenari dagokionez, azken bi hilabeteetan langabezia tasa %10etik beherakoa izan ondoren, abenduan atzera ere gainditu du kopuru hori. Izan ere, Eibarren eta Mendaron izan ezik, gainerako udalerri guztietan gora egin du langabe kopuruak.

Urtea okerrago bukatu

2022 osoari begiratua eginez, berriz, bailarako datuak zertxobait hobetu egin dira, ez ordea, Soraluzekoak. Deban, Elgoibarren eta Soraluzen gora egin du langabeziak eta gainerako herrietan, berriz, apurtxo bat behera.

Datuak herriz herri

Hona hemen abenduko datuak herriz herri:

  • Deba    166        %6,36
  • Eibar  1.470      %11,58
  • Elgoibar 480     %8,85
  • Mendaro  77    %7,58
  • Mutriku   206   %7,93
  • Soraluze   241    %12,92
  • Debabarrena  2.640     %10,07