Beste hiru puntu Sorarendako

Atzo, zapatua, 4-1 irabazi zuen Sorako Erregional mailako taldeak Aretxabaletako UDA taldearen kontrako norgehiagoka. Gainera, etxeko mutilek, 43. minututik irabazten joan arren, erasoan segitu eta beste bi gol sartu zituzten UDAren atean. Partida txukuna eta entretenigarria ikusi zuten hotzari aurre egin eta Ezoziko futbol zelaian izan zirenek. Eta gainera, Soraren hasierako hamaikakotik, hamar jokalari soraluzetarrak izan ziren.

Atzo, minutu bateko isilunearekin hasi zen UDAren kontrako partida, Sorako jokalari baten aitaitaren heriotzarengatik. Behin partida hasi eta gutxira, ezustekoa etorri zen etxekoendako, 7. minutuan gola sartu baitzien Aretxabaletako taldeak, Sorako atezaina aurreratuta harrapatu ostean.

Partida bizia hasi zen hortik aurrera; erasoan jardun zuten bi ekipoek, baina Sorak asmatu zuen lehenengo. 18. minutuan, Bioren pase eder baten ondoren, Letuk lortu zuen banakoa egitea. 

Berdinketaren ondoren, gogotik jardun zuten bi taldeek, markagailuan aurrea hartu nahian. Baina finago ibili zen Sora eta etxekoek bigarrena sartu zuten, oraingoan ere, Biok pasea egin eta Letuk sareratuta. Modu horretara, 2-1eko markagailuarekin erretiratu ziren aldageletara.

Bigarren zatiari dagokionez, arean zokoratu barik, erasoan segitu zuten etxekoek, Letu kapitainaren esanei kasu eginez. Saiatzeak saria dakar sarri eta halaxe izan zen atzokoan, 78. minutuan sartu zuen Sorako Urtzik 3. gola eta 86. minutuan sartu zuen, berriz, laugarrena eta azkena Markel Gilek.

Nasai irabazi zuen Sorak, eta gainera, indarra erakutsi zuen atzokoan. Poltsikoratutako hiru puntuei esker, orain, 16 puntu ditu Sorak eta ligako sailkapeneko bigarren lekuari eutsi dio beste astebetez.