Bihar hasiko du Euskadiko Liga Marraseko emakume taldeak

Marraseko nesken ekipoko hainbat jokalari, 2007-2008an jaiotakoak. Argazkiak: Arrate Gisasola.

Bihar, zapatua, jokatuko ditu Euskadiko Ligako lehen bi partidak Marras Hockey Taldeko emakumeen ekipoak. Gasteizen ditu bi hitzorduak, Street Hockey eta Burdinola taldeen kontra. 14 neskak osatzen dute Marraseko emakumeen ekipoa. Soraluzen, emakumezko ekipoa duen talde bakarra da Marras.

Bihar, zapatua, 10:00etan jokatuko dute Euskadiko ligako estreinako partida Marras Hockey Taldeko emakumeen ekipoak, Gasteizko Olaranbe kiroldegian. Hango Street Hockey Taldea izango dute aurkari. Ondoren, 13:45ean jokatuko dute bigarren partida Marrasekoek, kasu honetan, Bergarako Burdinola taldearen kontra.

Herriko emakumezko ekipo bakarra

Soraluzen, emakumezko ekipoa duen talde bakarra da Marras Hockey Taldea. 14 neskaz osatutakoa da, guztiak Soraluzekoak eibartar bat izan ezik. Aurten osatu da talde modura eta aurten estreinatuko dira Euskadiko Ligan.

Euskadiko Hockey Ligan sei talde lehiatuko dira: Street Hockey eta Sumendi gasteiztarrak, Metropolitano HC bilbotarrak, Soraluzeko Marras Hokey Taldea eta Zaragozako All Stars taldea. Azken horiek Euskadiko Ligan parte hartzen dute Zaragozan ez dutelako txapelketarik.