Euskal Selekzioarekin ari da jokatzen Marras taldeko Ane Bastardo gaztea

Hocekyko euskal selekzioa. Argazkia: Arrate Gisasola.

Eguenaz geroztik, A Coruñan dago Ane Bastardo hockey jokalari soraluzetarra, elkarte autonomikoen arteko hockey txapelketa jokatzen, Euskadiko selekzioarekin. “Oso ilusionatuta eta oso urduri” joan zen Marraseko jokalari gaztea, esperientzia aberasgarria izateko gogotsu. Bihar bueltatuko dira etxera.

Eguenean hasi zen 15 urtez azpikoen elkarte autonomikoen arteko hockey txapelketa. Euskadirekin batera, lehian dira, Gaztela eta Leon, Valentziako Erkidegoa, Katalunia, Madril, Galiza eta Kanariar Uharteak –azken hori bakarrik mutilen kategorian–.

Eguenean goizaldean abiatu ziren Euskadiko ordezkariak Galizara eta egunean bertan jokatu zuten lehen partida, iluntzean. Ane Bastardok orduantxe jokatu zituen lehen minutuak, atezain modura, Gaztela Leonen kontrako partidan.

Atzo iluntzean, berriz, Valentzia izan zuten aurkari eta hurrengo eta azkeneko hitzordua gaur, zapatua, 18:45ean izango dute, Galizako taldearen kontra, bosgarren edo seigarren postuarengatik lehian.

Bihar, domeka, bueltatuko dira jokalari gazteak etxera.