Soraboxeko bost boxeolari izango dira gaur Bergarako boxeo jaialdian

Sorabox taldeko boxeolariak, Ixa Rodriguez arduradunarekin. Argazkia: Goiena Komunikazio Taldea.

Guztia gertu dago gaurko, zapatua, Soraboxeko Ixa Rodriguezek antolatu duen boxeo erakustaldirako. Bergarako Udal Pilotalekuan egokituko dute ringa 16 boxeolari amateurrek borroka egin dezaten. Horietatatik bost boxeolari Sorabox elkartekoak izango dira eta gainerakoak Bizkaiko zein Gipuzkoako bestelako klub batzuetakoak. 18:00etan hasiko da erakustaldia, 16:00etan, berriz, pisaketa egingo dute.

Boxeo erakustaldia Bergaran egiteari buruz galdetuta, Rodriguezek esplikatu du Sorabox klubeko Josu Zalakain eta Andoni Kortabarria bertakoak direla. Gaineratu du batik bat Zalakaini begira antolatutako ekitaldia dela, zorte txarra tarteko, hark boxeolari moduan borroka bakarrean parte hartu ahal izan baitu orain arte.

Hain zuzen, Iosu Zalakainena izango da azken borroka, debuta egingo duen Gorka Belauntzaran –Errenteriakoa– kontra: "Ondo nago, topera. Lana eginda dago, bi hilabete egon gara topera entrenatzen, eta fisikoki oso ondo ikusten dut neure burua. Zapaturako gogoz nago", adierazi dio bergararrak Goiena Komunikazio Taldeari.