Karakate Bizirik Plataformak elkarretaratzea deitu du

Maiatza hasieran Karakatera egindako martxako argazki bat.

Bihar, barikua, Markel Olano diputatu nagusiak Soraluzera egingo duen bisitaren harira, Karakate Bizirik Plataformak elkarretaratzea deitu du. Helburua da Karakateko zentral eolikoak herrian eragin duen ezinegona eta zentralak mendian eta ingurumenean eragingo dituen kalteen berri zuzenean helaraztea Gipuzkoako Diputazioko ordezkariei, eskatuz ez dezatela eraiki zentral eolikorik Karakaten. 11:30ean da hitzordua, udaletxe aurrean. Plataformak herritar guztiak gonbidatu ditu parte hartzera. 

Kontuan hartuta Diputazioak otsailean Soraluzen ipini zuen kapsularen helburua zela herritarren partaidetza bultzatzea eta “Gipuzkoako etorkizunari buruz dituzten kezkak eta proposamenak partekatzea”, Karakate Bizirik Plataformaren ustez, bihar, soraluzetarrek aukera ezin-hobea dute Diputazioko ordezkariei zuzenean herritarren iritzia helarazteko, kasu honetan, mendigainean eraiki nahi duten zentral eolikoaren gainerako iritzia.  

Besteak beste, zentral eolikoak mendian eragingo dituen kalteen berri ematen duten panelak erakutsiko dituzte Karakate Bizirik Plataformako kideek.