Otsailaren amaieran izan zen Gipuzkoako Foru Aldundiaren kapsula Soraluzen. Haren helburua zen soraluzetarrek herriaren eta lurraldearen etorkizunari buruz dituzten ekarpenak batzea.
Eta batu ere batu zituzten ekarpen mordoxka bat. Partaidetza ikusgarria izan zela jakinarazi zuten bertan lanean izan ziren bi teknikariek. “Marka, errekorra” lortu zela ere esan zuten, 463 soraluzetarrek eraman baitzituzten ekarpenak.
Eolikorik ez, autobus zerbitzua, garbitasuna eta segurtasuna
Herritarrek egindako ekarpenen artean, berriz, lau errepikatu ziren gehien:
• Karakaten eolikorik ez ipintzeko eskaera.
• Autobus zerbitzu publiko hobea ipintzeko eskaera.
• Segurtasun handiagoa ziurtatzeko eskaera.
• Garbitasun handiagoa egon dadin eskaera.