Gaur, finalerdia jokoan

Aitor Atxotegi eta Manex Balerdi Aretxabaletako bikotearen kontra, maiatza hasieran.

Gaur, martitzena, Debarroko txapelketako nagusien mailako finalerdia jokatuko dute Manex Balerdik eta Aitor Atxotegik Aretxabaletako bikotearen kontra. 19:30ean da hitzordua, Araneko frontoian. Soraluzeko Pilota Elkarteko kadeteek, berriz, dagoeneko lortu dute finalerako pasea. Ekainaren 19an jokatuko dute berau.

Gaurko partidari dagokionez, itxaropentsu aurreikusten dute norgehiagoka Soraluzeko pilota elkarteko Atxotegi eta Balerdi pilotariek, maiatza hasieran Aretxabaletako bikotearen kontra jokatutako partida 22-5 irabazi baitzuten. 

Edozelan ere, kirolean ohi denez, partida bukatu arte ezin ezer esan seguru. 19:30ean ekingo diote lehiari lau gazteek.

Kadeteak finalean

Bestalde, Soraluze Pilota Elkarteko kadete mailako Ibon Ibarra eta Mikel Caramanzana pilotariek joan den eguaztenean jokatu zuten ligaxkako azken partida eta irabazi egin zuten. Horri esker, lehen postuan sailkatu dira eta ondorioz, dagoeneko eskuratu dute finalerako pasea. Ekainaren 19an jokatuko dute finala, Aretxabaletan.