2005ean SAPAk Soraluzeko lantegietako aktibitatea eten zuenetik, herriko lantegian lan egiten zuten langileek enpresak Andoainen duen lantokira joan behar izan dute lanera enpresak ipinitako autobusean. Hasierako urte hartan, 51 langilek ekin behar izan zioten Andoainerako joan etorriei baina urteek aurrera egin ahala, langileak jubilatu eta aurrejubilatu egin dira eta, ondorioz, egoera horretan zeuden langileak gero eta gutxiago izan dira, aste honetan azkenengo bi langileak aurrejubilatu diren arte (Barrutia eta Rascon).
Amaitu da
Honenbestez, 2021arekin batera amaitu da Soraluzeko langileen parte hartzea SAPA enpresan. Sorapediak jasotzen duenez, gaur egun Jokin Aperribay Errealeko presidentea jabe duen armagintzako enpresak 86 urte daroatzala jardunean Sociedad Anonima Placencia de las Armas izenarekin; 1935an, gerra aurretik, Espainiako inbertsore talde batek The Placencia de las Armas Company Limited bereganatu eta enpresa berritu zuenetik. Gerra osteko urteetan, SAPA Soraluzeko enpresarik handiena izan zen, herriko nahiz inguruko herrietako ehunka herritar langiletzat hartuta.