Gaurtik, patioa berriro ere zabalik

Eskolako patioaren atea, zabalik.

Gaurtik, astelehena, eskolako patioa berriro ere zabalik izango da arratsaldeetan. Iker Aldazabal alkateak esandakoaren arabera, patioaren itxiera gazteriaren prozesuaren baitan aztertu ondoren erabaki dute hura berriro ere zabaltzea. Betalde, datozen asteotan ipiniko dituzte patioan zaintza-kamerak.

Harrabotsa eragin zuen eskolako patioa arratsaldeetan ixtearen erabakiak. Hainbat gurasoren kexua tarteko, gaia Udalean, gazteria prozesuaren baitan aztertu zuten joan den astean eta erabaki zuten espazioa berriro ere zabaltzea, alkateak jakinarazi duenez.

Hori horrela, gaurtik aurrera, astelehenetik barikura 20:00ak arte eta zapatuetan 19:00ak arte, zabalik izango da eskolako patioa, nahi duenak erabil dezan.

Kamerak

Zaintza-kamerei dagokienez, berriz, haiek ezartzearen alde hartutako erabakiak ere eragin zuen hainbat gurasoren desadostasuna. Kasu honetan, bi arrazoirengatik; batetik, erabaki hori Eskola Kontseiluak hartu duelako eta ez “herritar guztiok”, guraso horiek dioten moduan, eta, bestetik, eskolako patioa adin txikikoen gunea delako. 

Bada, kamerei dagokienez, datozen asteotan ipiniko dituzte patioan; eskolak eta Udalak erdibana ordainduko dute haien kostua. Kameren eta intimitatearen harira sortutako kezka dela-eta, berriz, Aldazabal alkateak gogora ekarri du mota horretako kameretan grabatutakoa bakarrik ikusten dela inguruan zerbait gertatu bada, bestela, irudiak ikusi ere ez direla egiten eta denbora batera borratu egiten direla.