Errigora saskiak eskatzeko epea zabalik azaroaren 11ra arte

Ablitaseko auzolanarekin abiatu zuten kanpaina zapatuan. Argazkia: Errigora.

Zapatuan abiatu zen Errigora 2021 kanpaina, Nafar hegoaldeko uzta euskarari puzka izenpean. Hala, azaroaren 11ra bitartean, aukera izango da Nafarroako produktuez osatutako saskiak eskatzeko. Saskiak zuzenean eska daitezke Errigora.eus webgunean (antolakuntzak hobesten duen bidea) edo paperezko eskuorria beteta, Pil-pileanen, Iratxon edo Arranoan.  

Produktu mota edo kopuruaren araberako hiru saski mota daude aukeran: saski beltza, Errigoraren klasikoa (55€), saski berdea, ekologikoa (65€), eta saski zuria (75€), berezia. Horiek eskatu edo erosteko, online bidea hobesten da, Errigora.eus webgunearen bitartez, baina horrez gain, zuzeneko 700 salmenta-puntu ere izango dira Euskal Herriko herri ugaritako taberna, denda, ikastola, udaletxe zein euskaltegietan. Soraluzen, Pil-pilean Euskaltzaleen Elkartean, Iratxo Gozodendan edo Arrano tabernan bete daitezke eskuorriak.  

%25 euskalgintzara

Udazkeneko kanpaina hau Errigora elkarteak abian jarritako urteroko kanpaina da, AEK, Ikastolen Elkartea edo Sortzen bezalako eragileen babesarekin, besteak beste. Bertan, Nafarroa hegoaldeko 25 ekoizlek landutako elikagaiez osatutako saskiak saltzen dituzte, euskara ofiziala ez den lurraldean euskararen inguruan lanean ari diren eragileentzat dirua jasotzeko helbururekin. Izan ere, saskien balioaren % 25 Nafarroa hegoalde eta erdialdeko euskalgintza hauspotzera bideratuko da.

Iazko arrakasta gainditzea helburu

Eskariak egiteko joan zen zapatuan hasi zen, eta "iazko arrakasta berdindu edo gainditzea" espero dute koordinatzaileek. Izan ere, aurreko edizioa inoizko arrakastatsuena izan zen, 16.800 saski saldu baitzituzten. Horietatik 38, Soraluzen.

Datozen egunetan, herriko hainbat euskaltzalek ekimenaren berri emateko mahaia ipiniko dute kalean.