Kadeteek jokatu zuten lehenengo partida, Ibon Ibarra eibartarrak eta Mikel Caramanzana debarrak osatutako bikoteak Andoaingoaren kontra. 22-16 irabazi zuten.
“Kostata” irabazi zuten. 16-15 joan ziren atzetik Soraluzeko taldekoak, baina kanpotarren pilota aprobetxatu zuten; nahiz eta bizkorra izan pentsatu zuten komeni zitzaiela eta asmatu egin zuten, Atxotegi entrenatzaileak esandakoaren arabera. Azkenean 22-16 irabazi zuten partida.
Partida ederra eta ikusgarria
Eskuz binakako nagusien partida etorri zen ondoren. 22-17 irabazi zuten etxekoek, Muruak eta Bolinagak, Andoaingo Urbieta anaien kontra. Partidu benetan ikusgarria jokatu zuten lau pilotariek. Gogorra, intentsua, indartsua, jokaldi ederrekin. Txalo ugari eskaini zizkieten ikusleek.
Markagailuan 11-2ko aldearekin hasi ziren, soraluzetarren alde. Baina andoaindarrek eusten jakin zuten eta apurka-apurka tantoak egiten joan ziren, 14-10era ere iritsi arte. Hortik aurrera, markagailua parekatuago joan zen. Azkenean, baina, soraluzetarrek lortu zuten berenarekin segitzea eta 22-17 gailendu zitzaien andoaindarrei.
Paletan, bat galdu, bat irabazi
Gomazko paletako partidei dagokienez, berriz, bi jokatu zituzten. Etxean, Arane kiroldegian, justu-justuan eta 20-24 galtzen joan eta gero, 25-24 irabazi zuten soraluzetarrek, Santamaria-Fernandez bikoteak Andoaingo Loidi-Eskudero bikotearen kontra. Kanpoan, berriz, Gallastegik eta Rasconek Donostiako bikotea izan zuten aurrez aurre eta 25-11 galdu zuten.