ELAko idazkari nagusi Mitxel Lakuntzak ere babestu zuen atzoko manifestazioa. Hark salatu zuen egoitzetako gaur egungo eredua “bidegabea” dela, izan ere, finantziazioaren % 90 publikoa izan arren, egoitzen bi herenek irabazteko asmoa dute.
Gainera, manifestazioan salatu zuten langileek lan-karga jasanezinak dituztela, egunean ordu eta erdiko arreta baino ez baitute egoiliar bakoitzeko. "Eredu hori ez da bideragarria. Lan baldintza prekarioekin zerbitzu prekarioa baino ezin da eskaini-eta".
Lan-baldintzak eta arreta zerbitzua hobetzea
ELAko idazkari nagusiak erantzukizuna bere gain hartzeko eta negoziatzera eser dadin eskatu zion berriro Markel Olano Gipuzkoako Diputatu Nagusiari: "Olano, eseri ELAren proposamena entzutera, irtenbide bat dugulako, pandemia honetan bizi izan dugunaren ondoren bi gauza zor dizkiguzulako: langileen lan-baldintzak hobetzea eta gure adinekoentzako arreta-zerbitzua hobetzea. Egoitza-eredu gizatiarragoa, publikoa eta zaintzan oinarrituagoa dago jokoan”.