Asteburu bete-betea dute Soraluzeko Pilota Taldeko kirolariek, barikuan, zapatuan zein domekan, hiru egunotan lehiatuko baitira.
Finala
Barikuan gainera, partida garrantzitsua jokatuko du Mikel Caramanzana debarrak, eskuzko lau t’erdiko finala. 19:00etan hasiko da partida, etxean, Aranen. Haren ondoren, berriz, gazte mailako beste partida bat izango da, Lazkaoko eta Oiartzungo pilotarien arteko eskuz eskukoa.
Trinketeko finalistak
Zapatuan, berriz, Iruran dute hitzordua, kasu honetan, Gipuzkoako Trinkete Txapelketako partida jokatzeko. Soraluzetarrek Astigarragako bikotea izango dute aurrez aurre. Partida horren emaitzaren arabera erabakiko dira txapelketako finalistak zeintzuk izango diren.
Eta zapatuan, baita ere, gomazko paletako Gipuzkoako Herriarteko hiru partida jokatuko dituzte soraluzetarrek. Zumarragako pilotariak izango dituzte aurrez aurre. 10:00etan hasiko dira partidak.
Azkenik, domekan, Santamaria eta Fernandez pilotariek osatutako bikoteak Azkoitiko bikotearen kontrako partida jokatuko du, Udaberriko txapelketaren baitako partida, 10:30ean, Aranen.