Haizeteak txikituta laga du Plaza Zaharreko karpa. 02:00ak inguruan eman dio haizeak kolperik bortitzena eta orduantxe apurtu eta mugitu du lekutik karpa. Suhiltzaileak bertaratu egin dira eta ingurua hesitu egin dute, kalte gehiago sor ez dadin.
Udaltzaingoak emandako informazioaren arabera, datozen orduotan hasiko dira karpa erretiratzeko lanak, horretarako beharrezkoa den kamioia bertaratzen denean.
Bien bitartean, biharko azoka txikia lekuz aldatuko dute eta Erregetxean egingo dute. Horretarako, Erregetxeko lehen bi ilaretako aparkalekuetako autoak erretiratu egin beharko dira, bihar 07:00etarako.
Kalte gehiago
Osterantzean, bestelako kalteak ere eragin du haizeteak herrian Udal langileak, Udaltzaingoa eta alkatea buru-belarri ardi dira egoera aztertzen. Aurreratu dute, adibidez, Irure auzoan hainbat pinu errepidera bota dituela eta Zeletan arbola bat auto baten gainera jausi eta kalteak eragin dizkiola ibilgailuari.
Inguruan, berriz, luiziak daude gertuko hainbat errepidetan, Bergaran, Elgetan eta Eibarren, besteak beste.