Judoa kenduta (kontaktudun kirola baita), herrian egiten diren gainerako eskola kirol jarduerak urrian abiaraziko dira. Horixe izan zen atzoko batzarrean landutako puntuetako bat.
Beste bat izan zen eskola kirolari berari dagokiona. Kasu horretan, urriaren erdialdean hasiko da eskola kirola, aldaketa esanguratsuekin: talde txikiagoak egingo dira, talde bakoitzak astero ordubeteko jarduera besterik ez du izango (bi ordukoa izan ohi da), zapatuetan ez da partidurik jokatuko eta kontaktu bako kirol jarduerak landuko dituzte, begiraleek proposatuko dituztenak.
Horrez gain, umeek ez dituzte aldagelak erabiliko eta gurasoak ezin izango dira kiroldegira bertaratu eskola kirola egiten ari diren bitartean.
Derrigortasuna dela-eta, ika-mika
Kirol teknikari Maria Gallastegik kontatu duenez, luze jo zuen batzarrak, ia 21:00ak arte. Besteak beste, eztabaida piztu zen eskola kirola egitearen derrigortasunaren harira. Hainbat guraso eta bestelako kirol elkartetako hainbat kide ez dago derrigortasun horrekin ados eta urtero sortu ohi da gaiaren inguruko ika-mika, baita atzo ere.
Zentzu horretan, Gallastegik jakinarazi du, justu gaur, Gipuzkoako Foru Aldunditik mezua helarazi dietela gogora ekarriz eskola kirola egiteko derrigortasunak indarrean segitzen duela. Bestela esanda, Diputazioak baimendutako bestelako kirol eskoletan parte hartu nahi duten umeek (Soraluzeko kasuan futbol eskolan) derrigor egin behar dute eskola kirola.
Datozen egunotan, Plaentxi eskolatik oharra bidaliko dute eskola kirolean izena emateko, eta eskola kirolak izango dituen aldaketen berri emateko.