Oraingoan ere, EH Bilduk eskuratu ditu boto gehien herrian, botoen %40,25. EAJ izan da bigarren indarra, botoen %34,35 eskuratuta eta PSE-EE hirugarrena, botoen %13,05 eskuratuta. Parte-hartzea, berriz, %56,50 izan da. Aurreikusten zen COVID-19 pandemiaren eraginez parte-hartzea jaitsiko zela eta halaxe izan da. Bestalde, posta bidez jasotako boto kopurua nabarmen hazi da; guztira, 200 boto jaso dituzte postaz.
Parte-hartzearen jaitsieraren ondorioz, Eusko Legebiltzarrerako hauteskundeetara aurkeztu diren alderdi guztiek eskuratu dituzte boto gutxiago 2016ko hauteskundeekin alderatuta. Baina, proportzioak begiratuta, berriz, 4 puntu egin du gora EH Bilduk; ia 3 puntu egin du gora EAJk eta ia pareko geratu da PSE-EE, apurtxo bat jaitsita.
Ahal Dugu-Podemosek, berriz, golpe gogorra hartu du, ia botoen erdiak galdu egin baititu. Gauza bera gertatu da PPk eta Ciudadanosek elkarrekin aurkeztutako hautagaitzarekin, erdia baino gehiago galdu dute oraingoan.
