Kiroldegiko begirale Oierrek harrera egin, gimnasioa erabiltzeko gutxieneko azalpenak eman eta berehala hasi dira gimnasia egiten kiroldegiko solairu berria estreinatu duten lehen bi herritarrak. Biek ala biek kontatu dute kiroldegira joateko deseatzen zeudela, hura horrenbeste denboran itxita izan ondoren. “Ni etxean ibili naiz gimnasia egiten, baina ez da gauza bera”, esan du Haritzek.
Oier begiraleak, berriz, esplikatu du, asko jota, aldi berean 15 lagun egon ahal izango direla gimnasio berrian. Beraz, baliteke noizbait itxaron beharra izatea. Horrela bada, gimnasio berriaren parean dagoen spinning gela erabil dezakete erabiltzaileek, harik eta gimnasioan lekuren bat libratu arte.
Izan ere, gimnasio berriarekin batera, gertu dira kiroldegiko solairu berrian egokitu dituzten aretoak: spinning aretoa eta erabilera anitzekoa. Bigarren horretan egingo dituzte, adibidez, Birakako saioak eta kiroldegiak eskaintzen dituen ikastaro guztiak, hipopresiboak izan ezik.