Aurreko osoko bilkurako akta onartzeko eta alkatetzaren dekretuen berri emango duen puntuen ondoren, Zibismo Ordenantzaren aldaketa behin betiko onartzea proposatuko du Udal Gobernuak biharko osoko bilkuran.
Gauza bera egingo du gizarte larrialdiko egoerei erantzuteko harrera etxebizitzekin lotuta ere; kasu horretan, baina, haren erabilera arautuko duen ordenantza onartzeko proposamena jarriko du mahai gainean.
Hitzarmen proposamenak
Puntu horiez aparte, hiru lankidetza hitzarmen ere jarriko ditu mahai gainean Udal Gobernuak: batetik, NISAEren eta Soraluzeko Udalaren artekoa, datuak elkartrukatzeko. Bestetik, Soraluzeko, Elgoibarko, Mutrikuko, Mendaroko, Eibarko eta Debako Udalen artekoa, baztertzeko arriskuan dauden pertsonentzako tutoretzapeko Soraluzen dagoen etxebizitza erabiltzeko. Eta hirugarrenik, Soraluzeko Udalaren eta Bosques Sostenibles S.L.U enpresaren arteko lankidetza hitzarmena, mendigainean zuhaitzak landatzeko.
Eta esandako puntuez gain, besteak beste, Soraluzeko lau landa-guneak ofizialki zehazteko proposamena ere langai izango dute udal ordezkariek.