Domekan, ohi denez, 08:00etan osatuko dira hauteskunde-mahaiak; eta oraingo deialdian bestetan baino ikusmira handiagoa dago horren bueltan, Gaztañerre biharamuna izanda, ea mahaietan egotea tokatu zaien titular guztiak bertaratuko diren ala ordezko bati baino gehiagori tokatuko ote zaion hura ordezkatzea.
Aldagai asko mahai-gainean
Bata ala bestea, 09:00etarako mahaiek osatuta izan beharko dute, eta zabalik izango dira 20:00ak arte. Hori bai, ikusteko dago oraingo deialdi honetan zenbat herritarrek emango duten botoa, edo bestela esanda, zenbatekoa izango den abstentzioa. Oraingoan, horretan eragingo duten hainbat aldagai daude-eta mahai-gainean: herritarren asperdura, eguraldi makurra, Gaztañerre biharamuna…
Apirilekoetan, EH Bildu
Apirilaren 28an egin ziren Espainiako Kongresua eta Senatua osatzeko azken hauteskundeak. Soraluzen, EH Bilduk eskuratu zituen boto gehien: 642 boto (%30,23); oso gertu izan zuen EAJ 610 botorekin (%28,72). Hirugarren kokatu zen PSE-EE 396 botorekin (%18,64),Podemos izan zen laugarren, 275 botorekin (%12,95). PP izan zen, berriz, bosgarren 103 botorekin, Ciudadanos seigarren 45 botorekin eta Vox zazpigarren, 23 botorekin. Abstentzioa, berriz, %27,12koa izan zen.