Deigarria da Jokin Muñozek egindakoa; markagailua apurtu eta 36 minutu baino gutxiago behar izan ditu 10,5 kilometroak egiteko. Ez da atzean geratu Anartz Mugika soraluzetarra. Astelehenean alta hartu berria izan arren, bigarren helmugaratu da hura. Ainara Urrutia aretxabaletarrak, berriz, estreinaldia izan du gaur eta argi du errepikatu egingo duela. Indartsu ikusi dugu, ohi duenez, Elena Beristain. Eta poz-pozik, berriz, Ainhoa Velazquez, lehen soraluzetarra.
Aipatutakoez gain, korrikalari beteranoekin ere egin dugu berba. Elgoibarren bizi da Antonio Fernandez, 74 urteko korrikalaria. Alejandrori eta Soraluzeri esker hasi zen hura korrika eta oraindik ez dio laga. Asmorik ere ez du.
Soraluzeko beteranoena, berriz, ondo ezaguna da halako probetan. Gaurkoan ere, kale egin barik abiatu eta helmugaratu da Gonzalo Ariznabarreta; Soraluzeko lasterketak "xarma berezia" duela dio.