15:45ean hasita, taldeka eta jokalarika aurkeztuko dituzte Soraluze Futbol Taldea osatuko duten ekipo guztiak, txikienetatik hasita banan-banan. Gazte taldea izan ezik, gainontzeko guztiak osatu dituzte: benjamin 1 eta 2; alebin 1 eta 2 (Sorako futbol eskolakoak dira lau talde horiek); infantil; kadete eta gorengo mailak.
Jendetsua izango da
Aurkezpen ekitaldian ohi denez, guraso ugari bertan dela eta Sorako Zuzendaritzako ordezkariak ere bertan direla aurkeztuko dituzte aurtengo jokalariak. Eta haren ondoren, 17:00etan partidua jokatuko dute nagusiek, Azpeitiko Ikasberriren kontra.
Hasiera bikaina
Indartsu zelairatuko dira gorengo mailakoak, izan ere, joan den asteburuan egindako ligako estreinaldian 1-2 irabazi zion Oñatiko Aloña Mendiri, gorengo mailako iazko liderrari. Eta azpeitiarrak, berriz, 1-3 galdu ondoren etorriko dira Ezozira.
Haiez aparte, liga hasiera horretan, Sorako kadeteek 0-3 irabazi zioten Urolari eta infantilek bina berdindu zuten Urkiren kontra.