Joan den astearen amaieraz geroztik dabiltza igerilekuan margotze-lanak egiten. Disolbatzailea erabiltzen dabiltza, besteak beste. Eta hark usain gogorra sortu du.
Igerilekuko leihoak-eta zabalik izan arren, aireztatzea ez da nahikoa izan usain guztia kanporatzeko, eta egunotan kiroldegiko beheko pisuan eta inguruan nabarmena izan da berau.
Kezka
Horrek gaizki-egona eragin du kiroldegiko hainbat erabiltzaileren artean. Usain gogorra hartuta, batzuek kiroldegira sartzera joan eta buelta hartu dutela kontatu dute sare sozialetan; beste hainbatek diote buruko-minak izan dituztela kiroldegian egon ondoren. Eta oro har, kezka helarazi dute osasunarendako disolbatzailearen usainak izan dezakeen arriskuarengatik, nahiz eta berez "toxikoa" ez izan.
"Ez da toxikoa"
Kexuen jakitun, Soraluzeko Udalak jakinarazi du gaur bukatuko dituztela margotze-lan horiek, eta gogora ekarri du erabilitako produktua ez dela toxikoa. Onartu du, hori bai, usain gogorra dagoela kiroldegiko beheko solairuan.
Bestalde, dio kontuan hartuta dagoela orain, behintzat, ume gutxiago dabilela kiroldegian, igerilekua itxita dagoelako. Hala ere, “sortutako eragozpenengatik barkamena” eskatu nahi die erabiltzaileei.
