Martxa bizian dabiltza lanean igerilekuko obra ahalik eta lasterren bukatzeko; izan ere, hilabeteko atzerapena dute lanek, eta erabiltzaile asko dago haiek noiz bukatuko zain.
Bada, Udalak ipini du amaiera data: irailaren 30ean atzera ere erabiltzeko moduan izango da igerilekua.
Garbiketa bikoitza
Hain justu, egunotan usain gogorra dario bertatik, margotze lanekin dabiltza-eta. Hori bukatu eta aldamioak desmuntatu ondoren, Orion enpresak, obrak egin dituenak berak egingo du igerilekuaren lehen garbiketa. Eta hura bukatu ondoren, Trejok egingo du bigarren garbiketa, sakonagoa.
Behin hori eginda hasiko dira igerilekua betetzen. Bizpahiru egun beharko dituzte horretarako eta gero beste pare bat egun ura berotzeko. Gauzak horrela, bada, esandako moduan, irailaren 30ean zabalduko dute igerilekua.
Erreklamazioak
Igerilekua itxita izan den artean hura erabili ezin izan duten bazkideek aukera izango dute Udalean erreklamazioa aurkezteko, baldintza batzuen arabera. Horren guztiaren berri datozen egunotan emango du Soraluzeko Udalak.