Hutsegite bat tarteko, Aretxabaletako alderdi sozialistaren kartazaletan Soraluzeko alderdi sozialistaren hautagaien boto-paperak banatu zituzten hauteskundeak baino astebete lehenago.
Baliogabe
Akatsaz jabetu zirenean, berriro ere banatu zituzten boto sozialistak etxez etxe, oraingoan bertako hautagaitzarekin. Baina antza, 36 aretxabaletarrek ez zuten jakin gertatutakoa, eta etxeko botoarekin, Patricia Borinagarendakoarekin joan ziren botoa ematera domekan.
Boto zenbaketan, 36 boto horiek baliogabe modura kontabilizatu zituzten, eta horren ondorioz, Aretxabaletan zuten zinegotzi sozialista bakarra (Miren Lorea Lana Jauregi) galdu egin dute, ez duelako boto nahikorik lortu zinegotzi izateko.
EH Bildurendako
Aretxabaletako PSE-EEk galdutako zinegotzia, Aretxabaletako EH Bilduren eskuetara joan da. Izan ere, PSE-EEk 216 boto eskuratu zituen, eta baliogabe izan ziren beste 36ak batuta, 252 boto izango lituzke. Eta aldiz, EH Bilduk bere azken zinegotzia lortu du 250,16 botorekin, D’Hont Legearen ondorioz.
Soraluzeri dagokionez, Aretxabaletako hutsegiteaz jabetu bezain laster errepasatu zuten hemen egindako boto banaketa, Patricia Borinagak esan digunez, “auzoz auzo”, eta Soraluzen ez zen hutsegiterik izan.