Boto kopuruari begiratuta, 2015ean baino 60 boto gehiago eskuratu ditu oraingo honetan EH Bilduk. Igoera nabarmenagoa izan du, berriz, EAJk, 89 boto gehiago jaso ditu-eta. Alderdi sozialistari dagokionez, boto bat galdu du, eta 17 boto galdu ditu, berriz, PPk.
Datuak beste modu batean irakurrita, bada, soraluzetarren %82,89ak eman die botoa alderdi abertzaleei. Eta Espainiako hauteskundeetako beheranzko joerari eutsi egin dio PPk, baina kasu honetan, PSOEk ez dio eutsi goranzko joerari.
Parte-hartzea zazpi puntu pasatan handitu da 2015eko Udal hauteskundeekin alderatuta, baina boto gehikuntza hori bi alderdik bakarrik izan dute: EH Bilduk (%6,99 gehiago) eta EAJk (%14,47 gehiago). PSE-EEk behera egin du apur bat (-0,29) eta are beherakada nabarmenagoa izan du PPk (-21,25). Duda barik, bada, soraluzetarren gehiengoak alderdi abertzaleen alde bozkatu du.