Honako proposamenak helarazi zizkieten herritarrei sozialistek, batzuk aipatze aldera: kale-hezitzaileen programa abiaraztea; Haurren eta Nerabeen Premien Azterlanean jasotako ekintzak bultzatzea; interbentzio familiarrari dagokion programa indartzea; nagusiendako I. Udal-plana egitea; Esperientzia Gela indartzea; udalerrirako sarbidea hobetzea Gi-627 errepidetik Maltzaga-Soraluze norabidean; bi puntu horien arteko bidegorria bultzatzea eta instalazio elektrikoak hobetzea.
Parkeak eta aparkalekuak
Horrekin batera, Soraluzeko sozialistek beste honako jarduerak ere proposatzen dituzte: III. Berdintasun-plana eta Sexu Aniztasunerako I. Udal-plana egitea; estalitako parke inklusiboa sortzea eta ludotekako zein gaztelekuko eskaintza bultzatzen segitzea; aparkaleku publikoak eta doakoak egokitzea SAPAren lursailean; herriko zoladura apurka-apurka berritzen joatea eta bermatzea irisgarritasuna goiko auzoetara eta Maisuen Etxe inguruko etxeetara.