Kantujira bereziak emango dio ongietorria 21. Korrikari

19. Korrika herrian. Argazkia: Fernan Oregi.

Plaentxia Kantuan ekimenak kantujira berezia antolatu du bihar eguerdirako, Pablo Arruabarrenak eta Domentx Uzinek girotuta.  

Soraluzek kantari egingo dio harrera 21. Korrikari. Plaentxia Kantuan ekimenak bat egin du Korrika Kulturalarekin eta saio berezia antolatu du bihar eguerdirako. Oraingoan, Pablo Arruabarrena soinujolearekin batera, Domentx Uzin musikariak ere parte hartuko du kantujiran.

Kantujira eguerdiko 12:30ean abiatuko da udaletxe paretik eta herriko kaleetan ibiliko da Korrika heltzen den arte. Antolakuntzak jakinarazitakoaren arabera, Korrika arratsaldeko 14:30ak aldera helduko da Soraluzera. 

Lekukoa eroango duten taldeak

AEK jakinarazi du herrian Korrikaren lekukoa hartuko duten taldeen zerrenda:

Osintxuko muga: Soraluce S. Coop.

Inazibarko txabola parea: Sare eta AEK

Hirukurutzetako errotonda: Dantza taldea

Elektrika: Gure Esku Dago

Txurruken: Bizikale

Txurrukengo autobus markesina: Pelota taldea eta Mendi taldea

Olako zubiaren hasiera: Gaztetxea

Santa Anako aldapako semaforoa: Galtxagorriak

Benito Altzariak: Itxaropena

Txuritxu: EAJ-PNV

Udaletxea: Soraluzeko Udala

Txoko: EH Bildu

Guipuzcoano: Korner Morea

Gabolatseko zubia: Harrera

Ezozibideko parkea: Musika Eskola eta Ezoziko Ama Abesbatza

Elesa-Ganter: Keixeta eta Atxolin guraso elkarteak

Poligonoko zubia: LAB

Industrias Placencia: Sortu

Unamuno: Gipuzkoako Urak

Embalajes: Sora FT

Gabilondo: Pil-pilean

Bizikaleren bonoak

Bizikaleko merkatariek ere bat egin dute Korrikarekin eta 25 euroko lau bono zozketatuko dituzte bihar. Goizean zehar Bizikaleren dendetan zerbait erosten duenak papertxo bat jasoko du eta norbere datuak sartuta, papertxoa Plaza Berrian jarriko duten kutxan bota ahalko du, zozketan parte hartzekoZozketa bera, 13:30ean egingo dute, Plaza Berrian.

Korrikaren kantu guztiak megafoniatik

Bihar goizean, Korrikaren 21 edizioetako kantuak entzuko dira herri osoan. Korrika Batzordeak kantuen audioak prestatu ditu eta Udalak faroletako bozgorailuetatik emitituko ditu herria girotzeko.