Partidu motzak eta zirraragarriak jokatu zituzten atzo, domeka, Soraluze, Mugituz! topagunearen eskutik umeendako Soraluzen egindako lehen frontenis txapelketan.
Ligaxka eran antolatuta, eta bezperako helduen txapelketan modura, uneoro eta eten barik izan ziren frontenis partiduak Arane kiroldegian, eta eten bakoa izan zen ere gaztetxoen, gurasoen zein bestelako ikusleen joan-etorria bertara. Beraz, partaidetza aldetik, behintzat, erabateko arrakasta izan zuen ekimenak.
Guztiak saridun
Lehia estua izan zen jokalarien artean, eta finalera iristea lortu zuten Eneko Felixek eta Brahin Sidi Mohamedek eta Yossra El Mendilik eta Gorka Gallastegik. Azkenean, 12-8 eginda lehen bikotea gailendu zen eta zegokien txapela jantzi zuten. Txapeldunordeek ere eskuratu zuten garaikur berezia. Eta horrez aparte, jokalari guztiendako izan zen saria, izan ere, norbere izena zuen fronteniserako pilota bana jaso zuten opari txapelketan parte hartzearren.
(Argazkiak: Jon Agirre eta Ubane Madera).