Ixa Rodriguezen esanetan, gero eta zale gehiago dago eta horregatik erabaki dute aurten ere jaialdia Soraluzen antolatzea. Sarrerak 15 eurotan daude salgai Batzokian eta Kiroldegian eta 20 eurotan izango dira takilan egunean bertan. Dagoeneko saldu dituzte hirurehun sarrera.
Junior mailako neskak
Ixaren ustez, gaueko lehenengo borrokaldia izango da berezienetakoa; izan ere, hamasei urtetik beherako bi neskak egingo dute borrokan: Nora getxoztarrak eta Aroa sevillarrak. “Ez da ohikoa horrelako jaialdi batean junior mailako bi neska borrokan ikustea, eta konbate berezia izango da”.
Soraboxeko boxeolariak
Gaueko gainerako borrokaldiak Sorabox klubeko boxeolariek jokatuko dituzte. Sei boxeolari igoko dira ringera: Adur Odriozola, Oibar Artetxe, Oussama Hina, Julen Gallastegi, Oier Barrio eta Ixa Rodriguez bera. Ixa Rodriguez eta Teona Pirosmanashvili georgiarraren artekoa izango da gaueko borrokaldi nagusia, profesional mailakoa. Horrekin batera, azken orduan lotu duten gizonezkoen borrokaldi bat ere izango da, Adam Trenado eta Jose Nunezen artekoa.
Ixa sasoi betean
Ixa sasoi betean dago: “Oso ondo nago, gero eta konfidantza handiagoa dut neure buruarekin eta irabaztera aterako naiz. Teona oso argala da eta uste dut ni indartsuagoa izango naizela, baina auskalo, edozer gauza gerta liteke”.
Pisaketak Batzokian
Jaialdiko borrokaldi nagusietako boxeolarien pisaketak bihar arratsaldean egingo dituzte Batzokian, arratsaldeko 17:30etik aurrera.