3.298 soraluzetarrek dute eskubidea herri-galdeketan botoa emateko

Geltokiarendako hiru aukerak.

Gaur, astelehena, hasiko da autobus geltoki nagusiaren gaineko herri-galdeketa. Soraluzen erroldatuta dauden 16 urtetik gorako bizilagun guztiek dute botoa emateko eskubidea: 3.298 lagunek. Astean 13:00ak arte eta asteburuan goizez eta arratsaldez bozkatu ahalko da.

Honako galdera ipiniko du Soraluzeko Udalak mahai gainean: Nun nahi duzu kokatzea autobus geltoki nagusia? Erantzuteko hiru aukera dituzu: Errabal kalean (gaur egungo tokian), Zubi Nagusian ala Baltegieta kalean. 

Galdera eta hiru aukerak dituen boto-papeletak gertu daude. Udaletxeko lehen solairuan erreserbatu bat jarriko dute, hauteskundeetan modura, boto-emaleak nahiago duen kokalekua ixaz markatzeko. Ondoren, berau gutunazalean sartu eta Idazkaritzara eraman beharko da, botoa emateko.

Ordutegia

Astelehenetik barikura, eguerdira bitartean eman ahalko da botoa: 10:00etatik 13:00ak arte, Udaletxeko lehen solairuan dagoen Udal idazkaritzan. Zapatuan eta domekan, berriz, goizez 10:00etatik 13:00ak bitartean eta arratsaldez, 16:00etatik 19:00ak bitartean, Udaletxeko bigarren solairuan dagoen osoko bilkuren aretoan.

Emaitza domekan bertan jakinaraziko dute, boto zenbaketa bukatu bezain laster.

Informazio gehiago Soraluzeko Udalaren webgunean.