Mozorrotuta, mozorro barik, esprintean, korrika, oinez zein ume-karro eta guzti. Denetariko estiloak ikusi dira Soraluze, Mugituz! topagunearen eskutik goizean egin den San Silvestre Festan. Hori bai, guztiek ala guztiek izan dute irribarrea ahoan, ibilbidearen hasieran, amaieran edo erdibidean. 80 lagunen partaidetzarekin, 5 urteko korrikalaria izan da gazteena, eta 73ko bi berriz, nagusienak. Termometroen 3-4 graduak berehala gainditu dituzte giroaren berotasunarekin.
Helmuga goxoa izan dute, gainera, parte-hartzaileek gertu: salda, txorizoa, freskagarriak eta fruitu lehor mordoa zituen hamarretakoa, Mesedeetako egoitzakoen eskutik. Borobiltzeko, Mesedeetako egoitzako bertako, Belarrak eta Criado saltokietako eta Renegade markako opariak zozkatu dituzte korrikalarien artean.
Leihoen bestaldean, gainera, adi-adi zain izan dituzte egoitzako bizilagunak; egin duen hotzarengatik, barruan gelditu behar izan duten arren.
Soraluzeko albiste nabarmenenak eta azken ordukoak Whatsapp edo Telegram bidez jaso nahi dituzu? Harpidetu zaitez doan!
WHATSAPP: Bidali ALTA 699 86 87 29 telefono zenbakira –Whatsapp bidez–.
TELEGRAM: Batu zaitez @plaentxia kanalera.