5 urteko umeetatik hasi eta 65 urte pasako helduetarainoko herritarrek parte hartu dute gaur 11:00etan hasita, I. Soraluze Urban Trail kirol probaren baitan egindako Andaina herrikoian.
Euria tarteka-marteka eta termometroa behe samar egon arren, giro bero askoa transmititu dute Andaina egin duten 127 lagunek.
Irribarre handiekin abiatu, eta askori eskailera igoeretan irribarreari eustea kosta egin zaien arren, kementsu eutsi eta 12:30ak inguru zirela helmugaratu dira azken partaideak. Orduan bai egin dutela guztiek ere irribarre. Gustura egin ere. Oztopo-eskailera guztien gainetik lortu dutelako helmugara iristea.
Anoa gozoa
Plaza Berrian zain zuten ordurako anoa gozo askoa: salda bero-beroa, txorizo eta gazta ogitartekoak, fruitu lehorrak… nahi adina aukeran. Eta indarrak berreskuratu dituztenean egin dute I. Soraluze Urban Trail kirol probaren sari eta opari banaketa.
Izan ere, Soraluze, Mugituz! ekimenaren filosofiaren ildotik, gaur, kirol proba bietan parte hartu duten guztiak izan dira irabazle: kirolean jardun dutelako, parekidetasunez, nahi zuenak lehiakor, nahi ez zuenak paseoan, lagun arteko giroan, eta noski, amaieran, erabili den guztia behar den moduan birziklatuz.
Guztiak irabazle
Eta filosofia berberarekin eman dizkiete lasterketa luzeko irabazleei sariak, Manu Cifuentes arotzak egindako egurrezko garaikurrak. Eta ondoren zozkatu dituzte herriko hainbat saltokik zein herritarrek emandako opariak: Egotzako gaztak, aupa gu! markako materiala, Iratxo Goxo-dendan, KLB-6 saltokian zein Arcelus saltokian gastatzeko bonuak eta Renegade betaurrekoak.
Sariarekin edo barik, hori bai, gaur herritar mordoa etxeratu da gustura asko I. Soraluze Urban Trail kirol probari esker.