Zazpi gol ikusi ahal izan zituzten atzo, domeka, Sorako beteranoen partidua ikustera Ezoziko futbol zelaira joan zirenek: etxekoen seiak eta Deportivo Riojanok sartu zuena. Alde nabarmen horren zergatia esplikatu du Iraultz Arluziagak, Sorako jokalarietako batek: “Beterano-beteranoak ziren besteak, gu baino beteranoagoak”.
Hark esan du, gainera, “jende dezente” egon zela ikusten. “Poliki-poliki hasi ziren, eta azkenerako ikusle nahiko zegoen”.
Gabonetan edo udaberrian
Partidua amaitutakoan, “bazkari-luntxa” egin zuten jokalari beterano guztiek elkarrekin; “oso ondo ibili ginen, Errioxakoak ere oso gustura joan ziren”, dio Arluziagak. Eta dagoeneko hurrengoa noiz egin pentsatzen dabiltzala ere kontatu du: “Ea Gabonetan posible den, eta bestela udaberrian”.