plaentxia.eus

Emakumezko errugbilarien entrenamendua Ezozin

  Kirola

Joan zen astean, Eibarko errugbi taldeko emakumezkoek entrenamendua egin zuten Ezozin. Taldeak Euskal ligan jokatzen du eta Euskal Herriko puntakoenetako bat da.

Emakumezko errugbilarien entrenamendua Ezozin
Errugbi jokalariak Ezozin, entrenamendu saioan. | Ikusi handiago | Argazki originala

Aurretik Eibar Rugby Taldeko gizonezkoek egin zuten moduan, joan zen astean emakumezkoak entrenatu ziren Ezozin. Emakumezkoen taldea 2007an eratu zuten klubean eta denborarekin sendotu egin da: "nahiz eta hastapenak nahiko gogorrak izan ziren, klubaren zati garrantzitsu bat direla erakutsi dute (emakumezkoek) eta emaitza oso onak lortu dituzte. Gainera, interesa agertzen duen gero eta neska gehiago dago".

Nesken taldea une "gozoa" ari ei da bizitzen: "Euskal Herriko puntako taldeetako bat da. Jokalariak ditu Euskal selekzioan eta  Eskola nazionaletan. Taldea gogor dago eta hurrengo pauso ematea espero du: bigarren talde bat izatea".

Eskerrak Udalari eta herritarrei 

Klub armaginak eskerrak eman nahi dizkie Soraluzeko Udalari eta entrenamenduetara hurreratu diren soraluzetarrei: "Erraztasun guztiak eman dizkigute Ezozin entrenatzeko eta, gainera, alkatea ere etorri zaigu bisitan. Eskertzekoa da!", adierazi du Luis Platak, taldearen managerrak. 

Joan zen astean egindako entrenamenduekin amaitutzat eman dute Soraluzera egindako bisita eta hemendik aurrerako entrenamenduak Eibarko Unben egingo dituzte. Etorkizunean ere asmoa dute bailaran errugbia ezagutarazten jarraitzeko, "bailaran jokalarien harrobi eta eskola ona sortu dadin".   

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa