Kaleak umeenak izango dira astelehenetik aurrera

Ubane Madera 2018ko uzt. 5a, 16:18

Neska-mutiko talde erraldoia, iazko udalekuetan.

184 neska-mutikok eta haien hezitzaileek astelehenean abiaraziko dituzte aurtengo udaleku irekiak. Bi astez, kaleetan eta plazetan ibiliko dira 4-12 urte bitarteko umek jolasean eta firin-faran.

Lehen egunerako, udalerriko bi puntutan egin dute hitzordua elkartzeko: HH 1 eta HH2. mailako neska-mutikoak elkartuko dira frontoian, eta LH 3. 4. 5. eta 6. mailetako neska-mutikoak berriz, Plaza Berrian, guztiak ere 10:00etan. Bertan zain izango dituzte hezitzaileak.

Eraman beharrekoak

Umeek kamiseta zuri bat eraman behar dute, datozen egunotan, besteak beste, berau margotu egingo dute-eta.

Nagusiak, berriz, eguenean lotara joango dira San Andresera. Eta bertan parte hartu nahi dutenek astelehenean eraman beharko dute izen-emate orria beteta.

Bertan zein kanpoan

Soraluzeko Udaleko Haurren eta Gazteen Batzordeak eta Kukumixo Aisialdi Taldeak antolatutako udalekuetan ohi dutenez, 10:00etatik 13:00etara jolasak, tailerrak, irteerak eta bestelakoak egingo dituzte, Soraluzen bertan gehienak, Soraluze Haurren Hiria bilakatuta; eta egitaraua osatzeko, kanpora ere joango dira.

Hain justu, lehen asteko irteerei dagokienez, besteak beste, igerilekuetara egun pasa joango dira. Eta baita Aulestira (Bizkaia) ere. Han ere bainu-lekua dute, errekan, belardi handia bertan inguruan jolasgunea, ziburuak, futbolean jolasteko aukera...