Lau kilometroko lasterketa egin du oraingo honetan Ander de Luis korrikalari soraluzetarrak. Motza baina gogorra, 650 metroko desnibel positiboa zuen ibilbideak, eta gainera bero handia egin zuen Irimora Igoera lasterketaren XXXVIII. edizioan. Gainera, 12:30ean abiatu ziren korrikalariak.
Soraluzekorako "gogotsu"
Zailtasunak zailtasun, hirugarren postuan helmugaratu zen Ander de Luis, 00:16:26ko denbora eginez, lehenengoarekiko minutu eta 11 segundora. Eta bereziki garrantzitsua da emaitza on hori, hilabeteko etenaren ondoren lasterketetara bueltatu eta emaitzak erakusten duelako indartsu dagoela.
Orain dagoeneko Soraluzeko lasterketan pentsatzen dabil De Luis, Iñaki Ruizen omenezko lasterketan, hain justu; bertan parte hartzeko “gogotsu” dagoela adierazi du.