Lehen lerroan izan ziren herritarrekin batera, atzean lan ugari egin zuen bestelako herritar mordoak ere. Zirkuitua markatzen, korrikalarien izenak hartzen eta dortsalak banakatzen, luncha prestatu eta gero banatzen…
Jokin Martinezek egin zituen, berriz, antolakuntza lanez aparte speaker lanak atzokoan. Ederki egin ere. Eztarria jota urratuta bukatu zuen atzokoan.
Deigarria izan zen, gainera, lasterketa bukatu (14:00ak pasa) eta ordubete ingurura dagoeneko lasterketaren arrastorik, eta batez ere, herrira etorri zen jende mordoska horren arrastorik geratu ez izana.
Hondakinik ez
Ezta hondakinik ere. Azken zeregin horretan buru-belarri jardun zuen antolakuntzak, hasieratik. Plastikorik ez, hondakinik ere ez, saldaz eta txorizoz osatutako luncha banatu zuten, besteak beste, hain justu, hondakinen murriztea edo hobeto esanda, ahalik eta hondakin gutxien sortze aldera.
Lasterkarien dortsalak ere hartu egin zituzten amaieran, hurrengo ekimenean berrerabili ahal izateko. Ingurumenarekiko kontzientzia erakusteaz aparte, hori berori gauzatu ere egin zuten atzokoan.
Oroigarria eta eskerrak
Une hunkigarriak bizi izan ziren atzoko egunean, bereziki, Alejandro Rodriguez beraren familiarekin lotutako momentutxo horietan. Besteak beste, antolatzaileek eskerrak helarazi zizkien Alejandro zenak egindako guztiarengatik eta Manu Cifuentes arotzak egindako oroigarria eman zieten.
Haiek behin eta berriz helarazi zituzten eskerronak egindako guztiarengatik; Leire alaba nagusiak, antolatzaileei, krosean parte hartu dutenei, eta oro har, herri osoari eman zizkion eskerrak. “Jenio handia zuen Alejandrok, baina bihotza ere handi-handia zuen”, esan zuen, besteak beste.
Han zeudela, Alejandroren lagun zen Fernandok familiari eman zion lasterketa gogoangarri batean irabazi zuen domina, Alejandrok berari emandako laguntasunari esker irabazitakoa izan zelako. “Uste dut familiari dagokiola hau izatea”, esan zuen.
Eta besteak beste, gauza bera egin du Irati Iñurrieta korrikalariak. Nagusien mailan, berak irabazitako garaikurra Nerea Rodriguezi oparitu dio; Alejandroren alaba gazteak malko artean hartu du oparia.