plaentxia.eus

Borrokarako gertu!

  Kirola

51,200 kilo pisatu ditu Ixa Rodriguez soraluzetarrak biharko boxeo gau-belara begira Batzokian egindako pisaketa-saioan. 50,300 kilo pisatu ditu, berriz, aurkari izango duen Eloisa Rodriguez madrildarrak. Oilar-pisu barruan daude, bada, bi borrokalariak, pisaketa-saioaren lekuko izan diren epaileak eta Gipuzkoako Boxeo Federazioko presidenteak baieztatu duten moduan.

Borrokarako gertu!
Ixa Rodriguez eta Eloisa Rodriguez Batzokian egindako pisaketa-saioan. | Ikusi handiago | Argazki originala

“Batak duen kilo bateko aldea besteak parekatu egiten du profesional mailan eginda dituen lau borrokekin, beraz, oilar-pisu barruan egoteaz aparte, biak pareko samar daudela esan dezakegu”, adierazi du Manolo Kortajarenak, Gipuzkoako Boxeo Federazioko presidenteak. 

Pisaketa-saioa eginda, bi boxeolariek pisua zaintzeko izan duten azken orduotako gosea asetzeko tartea hartu dute, pisaketa-saioan laguntzera joan zaizkien boxeolariek lagunduta.

Izan ere, Ixa Rodriguezekin eta Eloisa Rodriguezekin batera Batzokian izan dira bihar, zapatua, amateur mailan borrokatuko diren Sorabox taldeko beste lau gazteak ere: Julen Gallastegi, Adur Odriozola, Oussama Hina eta Gorka Azkargorta. Pisua bertan zegoela aprobetxatuta, gainera, amateurrek ere konprobatu dute zein den eurena; “oso ondo daude”, esan du Ixa Rodriguezek berak. Edozelan ere, amateurrek bihar 18:00etan egingo dute benetako pisaketa-saioa.

Gaurtik biharrera, bada, lan nekeza izango dute boxeolari soraluzetarrek agerikoak zaizkien urduritasunak moteltzen; biharko eguna deseatzeko daude guztiak ere. 

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa