Azken luizi horiek, baina, ez dute aparteko eragozpenik eragin, Udaltzaingoak jakinarazitakoaren arabera. Eta Izagirre baserrira (Izarre) bidean jausi zen zuhaitza atzo bertan erretiratu zuten.
15:30ak aldera gorenen
Ibaiari dagokionez, berriz, hartu du beherako bidea, atzo eten barik gorakoa hartzen ibili ondoren. 15:30ak aldera izan zuen altuerarik handiena.
Bergaran, kanpora
Ikusgarri zetorren, ur-emari izugarrizkoarekin, abiada betean eta enbor eta bestelako gauza ugari zekartzala. Bergaran, adibidez, bidetik irten zen, Matxiategi inguruan.
Soraluzeri dagokionez, 15:30etik aurrera jaisten hasi eta atzera ere bistaratzen hasi ziren ibai bazterreko hormigoi tarteak, haren beherako joeraren adierazle.
Hobera
Eta gaur bide horretatik segitzen dihardu. Eguraldiari dagokionez, hobera egingo duela iragarrita dute adituek, bereziki, eguerdi partetik aurrera. Edozein modutan, Segurtasun sailak gaurko 12:00ak arte aktibatuta dauka alerta laranja prezipitazio iraunkorrarengatik.
