Zortzigarren doa Sorako gorengo maila sailkapen orokorrean, 28 punturekin, eta 23 punturekin 12. lekuan dagoen Aretxabaletako UDA izango du bihar, zapatua, aurkari Ibarran jokatuko duten partiduan (17:30). Sailkapenean aurrera egin nahi badu, hiru puntu garrantzitsu ditu, bada, jokoan, Sora beste hiru talderekin dago-eta, puntutara berdinduta.
Gorengoek, arratsaldean
Gainontzeko mailei dagokienez, bihar, 10:00etan dute hitzordua alebinek multi-kirolean jarduteko. Debako Amaika Bat-en kontra jokatuko du, berriz, infantil mailako taldeak, 11:30ean, etxean. Eta bihar arratsaldean, gorengo taldeaz aparte, jubenilen taldeak ere izango du partidua, kasu horretan, Elgoibarren, 18:30ean.
Domekari dagokionez, Lagun Onak taldearen kontra jokatuko dute benjaminek; lehen mailako alebinek, berriz, Bergara hartuko dute, 10:00etan eta bigarren mailakoek, Aretxabaleta, 12:10ean. Kadeteek borobilduko dute asteburua, Elgoibarren kontra, 11:45ean.