Bost tantoko aldea kontra zutela, pilota aldatu eta beste horrenbeste tanto jarraian egitea lortu zuten Atxotegi eta Olaizola bikoteak, Alberdirekin eta Aizpuruarekin 20ra berdintzea lortu arte. “Eta momentu horretan eurak urduritzen hasita eta gu berriz, hazita geunden”, kontatu du Aitor Atxotegik. Esperantzarako tartea izan zen hura, garaipena posible ikusten zuten-eta Atxotegik eta Olaizolak.
Baina, “gure arteko (bikotearen) gaizki ulertu baten ondorioz, 21. tantoa egin ziguten eurek eta hor amaitu zen gure tanto ilara. 22.a segidan egin ziguten gero”, laburbildu du Soraluzeko pilotariak Elgoibarren gertatutakoa.
Ikusle gehienak, Soraluzekoak
Partidua galdu arren, Atxotegik nabarmendu eta eskertu nahi izan du Elgoibarko harmailetara soraluzetar mordoa gerturatu izana. “Eskerrak gerturatu ziren lagun eta senide guztiei, asko izan ziren-eta. Ikusleen arteko zati handiena Soraluzekoak ziren”, dio pilotariak.
