Abizenak euskal grafiaz leloarekin, euskal jatorrizko abizenak izanik abizenok gazteleraz idazten dituzten herritarrei zuzendutako kanpaina abiarazi du Soraluzeko Udalak; hain justu ere, abizen horiek euskal grafiara alda ditzaten animatzea du helburu kanpaina horrek.
Aurkeztu beharrekoa
Bake epaitegira edo erregistro zibilera joanda egin daiteke hori; asmoaren berri eman eta honako dokumentazioa aurkezteaz batera:
- Nortasun agiriaren fotokopia eta originala.
- Hitzez-hitzeko jaiotza-agiria (Bake epaitegian bertan eskatzen da).
- Udaleko errolda-agiria.
- Familia liburua (Aldaketa seme-alabentzat eskatzen bada).
- Seme-alaben NANa eta Errolda agiria (14-18 urte artekoak badira).
Azken horien kasuan, 18 urtetik aurrerako seme-alabek euren kabuz egin beharra dute eskaera.
Adinez nagusiek, euren kabuz
Bestalde, Udalak jakinarazi du aukera dagoela aldaketa adin txikiko seme-alabentzat bakarrik eskatzeko grafia aldaketa, gurasoena aldatu gabe. Edozein modutan, jakinarazi du, baita ere, gurasoak aldaketa eginez gero, berau automatikoki egingo zaiela adin txikiko seme-alabei.
Soraluzeko Udaleko Hizkuntza Politikaren Batzordeak bultzatutako kanpaina da berau, Pil-pilean Euskara Elkartearekin batera.