“Herri txikia izateko maila guztietan ekipoa osatzea asko da”, azpimarratu du Alberto Goenagak, Soraluze Futbol Taldeko presidente berriak. Erregionaleko taldea “jausi” egin den arren, (“bi talde izatean, oso zaila zen hori kudeatzea”) maila guztietan taldeak izateari eman dio garrantzia Goenagak. “Kadete eta jubenil mailetan justu-justu lortu dugu taldeak osatzea. Arriskatu egin gara, ze batean daude 16 jokalari eta bestean, 17. Oso justua da hori, baina lortu dugu. Azken batean helburua da zenbat eta gehiago, hobe”, gaineratu du hark.
Benjaminen bi talde
Hori horrela, zortzi talde osatu dituzte aurten: futbol eskolako benjaminetatik hasi eta gorengo mailako ekipora arte. Hain justu ere, zapatuan aurkeztu zituzten talde eta jokalari guztiak Ezoziko futbol zelaian, partiduen aurretik.