Infantilen lehenengo maila KOPA
TALDEAK: Aretxabaleta "B" 0-5 Soraluze
Golak: Xabat, Antxon, Julen Gonzalez, Lander 2
Partidua hasi eta berehala aurretik jarri ziren markagailuan Xabaten golari esker. Hortik aurrera partida bide onetik eraman zuten Soraluzetarrek eta aukera asko izan zituzten arren partidua 0-5 amaitu zen. Bi jardunaldi falta dira eta dagoeneko final laurdenetara sailkapena lortua dute.
Lehenengo erregional maila KOPA
TALDEAK:Soraluze "B" 3-0 Aloña Mendi
Golak:Xabier Gil, Argoitz, Aitor Barrutia
Zapatuan hil ala biziko partida jokatu zuten bigarren eta hirugarren sailkatuen artean. Partidua hasi eta berehala Xabi Gil gazteak etxeko taldea aurretik jarri zuen. Lehenengo zati parekatua ikusi genuen, Argoitzek aldaratze bat hartu eta zelai erditik markagailuan bi eta hutsekoa jarri zuen arte. Maldan gora jarri zitzaien partidua oñatiarrei. Lehenengo zatia amaitu aurretik, epaileak Aloña Mendiko aurrelaria egotzi zuen. Bigarren zatian, kanpoko taldeak ez zuen izan partiduan sartzeko aukerarik eta norgehiagoka amaitzear zela, Aitor Barrutiak egin zuen 3-0ekoa.
Gorengoen erregional maila
TALDEA: Beasain 1-1 Soraluze
Golak: Aritz Cenzual
Partida benetan lehiatua Loinaz futbol zelaian jokatu zena. Aukera gutxiko lehenengo zatian, epaileak balio gabe utzi zuen Letuk buruz sartutako gola, jokoz kanpo zegoelako. Bigarren zatian ere aukera gutxi ikusi ziren, baina, Mohak eginiko jokaldi bat Cenzualek bikain aprobetxatu zuen taldea aurretik jartzeko. Partidu amaieran Iosu Unanuek bigarren txartela ikusi zuen eta ondorioz, gorria. Beasainek 10 jokalariren aurrean berdinketa lortu zuen partidua amaitzear zela.
Alebinak
Azpeitian jokatutako triangeluarrean, bi partidutatik bat irabazi eta bestea galdu egin zuten Aitor Oregik zuzendutako neska-mutilek.